أخبار اليوم - أثار منشور لكابتن يعمل ضمن تطبيقات النقل الذكي موجة تفاعل واسعة بعد أن وجّه رسالة صريحة لزملائه في المهنة، داعيًا إياهم إلى الواقعية والقناعة وعدم المبالغة في الشكوى.

الكابتن الذي فضّل عدم ذكر اسمه كتب:
"ما بعرف إذا أنا الوحيد اللي مبسوط بهالشغلة، يمكن لأني من البداية عارف شو بشتغل ومجرب شغل كثير قبل هيك، مش معقول تكون مفكر إنها رح تعمّرك قصر! الشغلة هاي انعملت حتى تزيد دخلك مش لتبني عليها أحلام كبيرة وتغرق بالتزامات فوق طاقتك."

وأكد أن بعض العاملين في هذا القطاع يحمّلون العمل أكثر مما يحتمل، قائلًا:
"مش منطقي تعمل التزاماتك الشهرية ألف دينار وتلوم الشغل بعدين، هاي الشغلة بتأمن وجبة، دخان، وكاسة قهوة، وإذا رضيت فيهم رح تعيش مرتاح."

وأضاف منتقدًا من ينظرون للعمل نظرة سطحية:
"إذا كل تفكيرك كيف تطلع حق الأكل والدخان وتعد الأيام لتنام، هاي مصيبة… هاي عيشة الدواب، مش البني آدم. الإنسان لازم يكون عنده تفكير وطموح وتخطيط، مش بس استهلاك يومي."

وتساءل مستغربًا من شكاوى بعض الكباتن:
"كيف في ناس بيحكوا إنهم بيطلعوا 30 دينار باليوم؟ أكيد قصدهم دينار عراقي! الشغل موجود، بس الصدق والنية غايبين."

واختتم منشوره برسالة لمن يسعون للعمل عبر التطبيقات قائلًا:
"إذا عندك دخل، خليك قنوع، وخلّي هالشغلة للي ما عنده رزق بالمرة، لا تلاحقوا الغلابى على لقمتهم. تعب السيارة، التراخيص، والتطبيقات كلها مصاريف، فلا تدخلها إذا مش قدها!"